.. للزين ود حامد
(تلغرافات(
محمد الحسن حسن سالم (حميد)
باسم الحاضر والمستقبل
ست الدار بت أحمد قالت:
ليك يا الزين ود حامد، شوقنا.
أما بعد،
المبعوتة المنك.. وصلت.
ورُح فكيت الطلب الفوقنا.
باقي الدين، يا الزين، خلصتو.
قدر الفاضل.. مصروف راشد والتومات.
والجايات من جاي.. لا جاي.
زي ما قلت ليك قبال ده،
شهر إتنين حا نطهر راشد.
شهر إتنين المدرسة تأجز.
الله يبعد العارضي تجينا.
وراشد حالف ما يطهر،
إلا أبوهو وعمتو تحضر،
وإلا يجيبو الغنايين،
شان الشوق بت سرنا ترقص.
قلنا نجيب المداحين،
طنطن.. أنا جاي من الحج.
وعارف راشد، لما يطنطن،
كل الدنيا الفيها تطنطن.
غايتو بشر.. بس ربو يهون.
التعليقات (0)
جاري التحميل...