الطمبارة والغناي

محمد طه القدال

نحن أهل الفرحة جينا

لا المدامع وقفتنا ولا الحكايات الحزينة

لما درب الرايحة جابنا، جابنا في هادي المدينة

يا ولدي الدروب شقاقا، بحر التيه

ليك درب ولا دربين، مساك الدروب ضهاب

ليك قلب ولا بالين، وسواي القلوب كضاب

ليك ضهر ولا سرجين، ركاب السروج وقاع

شق يا ولدي بحر التيه، بتتدردر وتتودر

ولامن يوم علي تايتنا ديك ترسي

نعزك بالقبيل داخرنو ليك

الشوق بحر يا ولدي، بحراً تيه

قت ليك العليك ادرابو، لا تنغش ولا ترضابو، لا تنغش

في الزمن الزمين والكي يسوهو خلاف عشان الني

عليك الدور وتصريف الليالي، بدور تشيل ما شلنا من الهم

ولا من دمعة ترمي الدمعة فوق دربك

روح يا با .. وأبقَ قفاك، لا تعاين ولا تعاين علي موطاك

ولا تندم علي خطوا تملي مشيتو لي قدام

وأبقى العاتي زي سنطتنا، زي صبرا نلوك فوق مرو زي الزاد

لا شيتاً نزل في الجوف، ولا برجع ولا بنزاد

واركز للبجيبها الريح، تقيف إنت ويشيلها الريح

وأبقى العاتي، والدرب الوراك مسدود، وشيل شيلتك

بقيت للنص، لا حلماً بجيب البر ولا حدود

وانبليتا أختا الرملة، ما تقع البكان الهش

هي الممطورة ما بتبالي من الرش

النعمة بتعرف عاطيها، والجمرة بتحرق واطيها

بالكيلة عطانا، وما لقينا فوق جمر خطانا، وما لقينا